22 May 2010
Is ar Dháithí Ó Sé ó TG4 a bronnadh an chéad ghradam Gael-Réalta Gala mar a fógraíodh ag Gradaim Chumarsáide an Oireachtais i gcomhar le Gala in Farmleigh i mBaile Átha Cliath, Dé hAoine, 21 Bealtaine. Seo an dara dea-scéal in aon tseachtain amháin ag Dáithí – an scéal faoi Rós Thrá Lí agus anois an fógra gurb eisean Gael-Réalta Gala na bliana seo!
Ba é Aengus Mac Grianna ó Nuacht RTÉ a bhí i mbun an tsearmanais ag na Gradaim a eagraíonn Oireachtas na Gaeilge trína ndéantar ceiliúradh ar na láithreoirí teilifíse agus raidió, ar na haisteoirí agus na hiriseoirí agus ar an lucht déanta clár a bhfuil cion oibre thar na bearta déanta acu in earnáil na cumarsáide Gaeilge le bliain anuas.
"Is mór an scéal é seo dom,” a deir Dáithí Ó Sé. "Fógraíodh níos luaithe an tseachtain seo gur mé a bheidh i m'fhear an tí ag Rós Thrá Lí agus is barr ar an dea-scéala Gradam Gael-Réalta Gala. Táim ag freastal ar Ghradaim Chumarsáide an Oireachtais le blianta agus is iontach an cor nua a cuireadh iontu i mbliana leis an nGradam nua seo. Tá mé an-bhuíoch de gach duine a vótáil ar mo shon," a deir sé.
Fuair Na Cloigne (TG4), an scéinséir osnádúir arna stiúradh ag Robert Quinn agus arna léiriú ag Ciarán Ó Cofaigh gradam Dhráma Teilifíse na Bliana. Seó Spóirt, a chuireann Dara Ó Cinnéide, iar-chaptaein Chiarraí, i láthair, a bhuaigh an gradam do Shraith Teilifíse na Bliana. Ba leis Na Cloigne arís an gradam d'Aisteoir na Bliana nuair a scuab Darach Ó Dubháin an chraobh leis as ucht a chuid aisteoireachta i bpáirt Sheáin Uí Dhónaill. Ainmníodh Emer Ní Chonaola, láithreoir nuachta TG4 mar Phearsa Teilifíse na Bliana.
Rug Rónán Mac Aodha Bhuí ó RTÉ Raidió na Gaeltachta dhá ghradam leis - Sraith Raidió na Bliana do Rónan Beo @ 3 agus Pearsa Raidió na Bliana. Bronnadh gradam Iriseoir na Bliana ar Bhreandán Delap ó Beo! agus ba é Alan Titley a gnóthaigh an gradam do Cholúnaí na Bliana as ucht a chuid saothair ar an Irish Times.
"Tá muid thar a bheith sásta le gradaim na bliana seo agus leis an ngradam nua, an Gael-Réalta Gala 2010,” arsa Liam Ó Maolaodha, Stiúrthóir Oireachtas na Gaeilge. "Tréaslaím a ghradam le Dáithí agus leis na buaiteoirí eile arb iad a gcomhghleacaithe féin i saol na cumarsáide a thug an t-aitheantas dóibh as ardfhiúntas a gcuid saothair," a deir sé.
Ba í seo an chéad bhliain a raibh baint leis na gradaim ag Gala, ceann de na grúpaí miondíolacháin is tréine a bhfuil forás fúthu in Éirinn faoi láthair, agus tugadh isteach an gradam Gael-Réalta Gala 2010 d'fhonn na gradaim a chur ar a n-aird do phobal níos leithne. Bhí Aoibhinn Ní Shúilleabháin, Gráinne Seoige, Bláthnaid Ní Chofaigh agus Michelle Beamish ar an ngearrliosta don Ghradam sin freisin. Is é Gael-Réalta Gala an t-aon ghradam ar trí vótaí an phobail a roghnaíodh an buaiteoir agus chaith daoine ar fud na tíre ar fad vótaí lena aghaidh.
"Tá an ceangal le hOireachtas na Gaeilge i ndáil le Gradaim Chumarsáide an Oireachtais i gcomhar le Gala ar cheann de na príomhbhearta againn i bhfeachtas dar teideal Gala Goes Gael agus ba chúis ríméid dúinn an dea-thoradh a bhí air," arsa Gary Desmond, Príomhfheidhmeannach Gala. "Ghlac na siopaí páirt go fonnmhar ann agus ba mhór i gceist againn go mbeadh páirt mhór ag an lucht siopadóireachta sna gradaim,” a deir sé.
Chuir bronnadh Bhuaic-Ghradam Cumarsáide an Oireachtais ar fhoireann an nuachtáin Foinse (1996-2009) críoch leis an ócáid. Pictiúr: Comhghairdeachas, a Dháithí! Dáithí Ó Sé ó TG4, a bhuaigh an chéad ghradam Gael-Réalta Gala. In aice leis tá Michelle Beamish ó Seacht agus an dráma nua ar TG4, An Crisis agus Eileen Dunne ó RTÉ.
Alt le ceadunas ó: www.antoireachtas.ie/nuacht2.php
.jpg)
.jpg)
.jpg)